اكتب ليك

موضوع: اكتب ليك السبت ديسمبر 19, 2009 7:39 pm

أكتب ليك واطّول في كتاباتي
يفيض احساسي
وأملأ الدنيا بكلمات خطاباتي
بجمع ليك لغات الدنيا واكتب ليك
وبي لغة العجم مرات
وبالعربي الشديد وفصيح
وبي لغة الملائكة احيان
والسرياني والتسبيح
وبي كل ذرة في ها الكون
اكتبها ليك وأرسلها فوق جناح الريح
أكتب ليك في الأشجار
علي الأزهار
وفي الأنهار
محل ما تمشي قدامك
تلاقي حروف رسالاتي
لأنك انت من ذاتي...يا ذاتي
ومهما كتبت ما بقدر أعبر ليك عن الجواي
ومهما طاوعت أقلامي كلماتي
***
وليه ما اكتب
وانت الماضي بي احزانو
بأفراحو... والمستقبل الآتي
كتاباتك ...شوية خلاص
وانا الراجيكي تكتبي لي كم دفتر وكم كراس
ومنها أفصل جبة وأندروش
كمان طاقيي فوق الراس
ومن كلماتها اسوي السبحي والبخرات
وكم حجبات ..اداريبن عيون الناس
وكمان تقروقة في محراب هواك أجلس مع الجلاس
وأخلي الباقي اتغتابو ..لو بعدك غشاني نعاس
وانا الراجيك تكتبي لي ..كتاباتك تكون في الظلمة لي نبراس
انا العايش فراقك لي ...بشوفك في عيون الناس
وعاذرك لو كتبتي قليل..رضيان بيهو مادام بي وفاء واخلاص

*********

أريت يوما فرقني معاك ..يكون محذوف من التأريخ
وتبقى ايامنا سته ونبقى بيها قراب
أريت بلدا تحرمك مني...لوما انت تبقى خراب
ويسكن في خرابا البوم ... ويتصايح عليها غراب
وصاعقة ً تدكها ..ما تفضل فيها ذرة تراب
وتولع فيها نار الله ..تصبح كوم رماد وهباب
تمرقي انتي.... والناس المعاك قراب
وما دعّيت عليهن خاتي...لكن الفراق اسباب